Форум » Частые вопросы » Китеж » Ответить
Китеж
САП: [more]Быст в лѣто 6747. Попущением Божиим грѣх ради наших прииде на Русь воевати нечестивый и безбожный царь Батый. И разоряше грады и огнем пожигаше, церкви Божия такоже разоряше и огнем пожигаше же. Людей же мечю предаваше, а младых дѣтей ножем закалаше, младых дѣв блудом оскверняше. И бысть плач велий. Благовѣрный же князь Георгий Всеволодовичь, сия слышав, плакаше горко. И помолився ко Господу и пресвятѣй Божией Матери, собра вои своя, поиде противу нечестиваго царя Батыя с вои своими. И егда сразишася вои обои вкупе, бысть сѣча велия и кровопролитие. Тогда у благовѣрнаго князя Георгия и бысть мало вой, побѣже благовѣрный князь Георгий от нечестиваго царя Батыя вниз по Волге в Малый Китеж. И много брася благовѣрный князь Георгий с нечестивым царем Батыем, не пущая его во град свой. Егда же бысть нощь, тогда благовѣрный князь Георгий изыде тайно из града того въ Больший град Китеж. На утрие же воста той нечестивый царь на град той с вои своими, приступом приступи и взя его. И всѣх поби и прируби людей во градѣ том. И не обрѣте благовѣрнаго князя во градѣ том, нача мучити человека, и немогий мук терпѣти повѣда ему путь. Той же нечестивый гнаше вслѣд его. И егда прииде ко граду тому, нападе на град той со множеством своих, и взя той град Больший Китеж, что на брегу езера Свѣтлояра, и уби благовѣрнаго князя Герогия месяца февраля в 4 день. И поеха из града того нечестивый той царь Батый. И послѣ его взяша мощи благовѣрнаго князя Георгия Всеволодовича. И послѣ разорения того запустѣша грады тѣ, Малый Китежь, что на брегу Волги стоит, Больший же, что на брегу езера Свѣтлояра. И не видим будет Болший Китежь даже и до пришествия Христова, яко же и в прежняя времена бысть сия, яко же свидѣтельствуют жития святых отец, патерик Монасийский, и патерик Скитский, и патерик Азбучный, и патерик Иеросалимский, и патерик Святыя Горы,[14] яко сия святые книги согласны, в них писаны жития святых отец, и сокровенныя обители не едина, но много монастырей, и въ тѣх монастырех много множество бысть святых отец, яко звѣзд небесных просияв житием своим. Яко пѣска морскаго невозможно исчести, тако и сих невозможно писанию предати и вся списати. О них же, провидя Духом Святым, блаженный и пророк Давыд царь, удивляясь, вопиет Духом Святым, в богодухновенной книгѣ своей Псалтыри глаголет: «Праведник яко финик процвѣтет и яко кедр иже в Ливанѣ умножится, насаждени в дому Господни во дворѣх Бога нашего процвѣтут».[15] И еще той же пророк царь Давыд: «Мнѣ же зѣло честнии быша друзи твои, Боже, зѣло утвердишася владычествия их, изочту их, и паче песка умножатся».[16] О сих, провидя Духом Святым, блаженный апостол Павел в послании книги своея глаголет, провидя, сие слово к нам глаголет: «Проидохом во овчинах и козиях кожах, лишени, скорбящеи, озлоблени, имже не бѣ достоин мир».[17] То же слово и святый Иоанн Златоуст рече, в поучении своем глаголет в неделю 3-ю поста. То же слово, провидя, к нам святый Анастасий горы Синайския[18] глаголет. Сие же слово апостольское, провидя, нам глаголет и преподобный отец наш Иларион Великий,[19] о святых пишет: «И такоже убо в послѣднее время будет сие: грады и монастыри сокровеныя будут, якоже антихрист царствовати начнет в мирѣ. Тогда побѣгут в горы и в вертепы, и в пропасти земныя». Человеколюбивый же Бог не оставит тогда хотящаго спастися. От усердия, и умиления, и слез все человеку Бог строит. Самого Спасителя Божественная уста глаголаше в пресвятом Евангелии, рече, яко вся ищущему и хотящему спастися дастъся.[20] И по убиению святаго и благовѣрнаго и великаго князя Георгия Всеволодовича и по погребению честных мощей его, в лѣто 6-е прииде той царь Батый воевати в русское царство. Пойде же противу Батыя царя благовѣрный князь Михаил Черниговский з боярином своим Феодором. И егда сразишася вои обои вкупѣ, и бысть кровопролитие велие. И уби той нечестивый царь Батый благовѣрнаго и великаго князя Михаила Черниговскаго з болярином Феодором в лѣто 6750, месяца сентября в 20 день. И послѣ убиения благовѣрнаго князя Михаила Черниговскаго во 2-е лѣто[21] уби благовѣрнаго князя Меркурия Смоленскаго[22] той нечестивый царь Батый в лѣта 6755, месяца ноября в 24 день. И бысть запустѣние московскаго царства и прочих монастырей и того града Большаго Китежа в лѣто 6756. Повесть и взыскание о граде сокровенном Китеже. Аще ли же который человек обѣщается истинно итти в него, а не ложно и от усердия своего поститися начнет, и многи слезы пролиет, и пойдет в него, и обѣщается тако, аще и гладом умрети, а из него не изыти, аще ины многи скорби претерпѣти, еще и смертию умрети, вѣждь, яко спасет Бог таковаго, яко стопы его вся изочтены и записаны будут аггелом. Яко на путь спасения поиде, яко же свидѣтельствуют о сем книги, патерик Скитский. Бысть нѣкоторый отец, обрати нѣкую блудницу от блуда. Блудница же поиде с ним в монастырь. И прииде пред враты монастыря того и умре. И бысть спасена. И вторая такоже изыде в пустыню со отцем и умре. И прияша ангели душу ея и возведоша по лѣстнице на небо. Тако и той человек. Аще случитъся и умрети, по Божественному писанию рассудится. Бѣжа бо той подобен сему духовно бежа от блудницы вавилонския темныя и скверныя мира сего, яко же святый Иоанн Богослов во Откровении, книги своея, написа. О послѣднем времени глаголет, яко жена сѣдя на звѣри седмиглавном нага и безстудна, в руках же своих держит чашу, плъну всякия скверны, и смрада исполънена, и подает в мирѣ сущим, любящим сея, первие патриархом, царем, и князем, и воеводам, и всяким властем богатым, и всяким людем в мире сем суетнѣм, любящим сласти сея. А иже хотящаго и желающаго спастися подобает бѣжати мира и сласти его. Еже рече той Иоанн, провидѣ Духом Святым, яко жена побѣжит въ пустыню, и змий гоняше в слѣд ея, иже и совращает с праваго пути хотящаго жити смиренъным и духовным путем. Той же проклятый змий учит широким и пространным путем ходити и стезею злобы, и запинает, и возбраняет с праваго пути, и совращает, и велит жити растлѣнным житием, и возъбраняет по правому пути ходящим. А иже хощет, и ищет, и желает спасения, того человека и наипаче вразумляет и помогает ему благодать Божия, и учит, и ведет его на совершенное духовное смиренное житие. Никто же бо никогда нигдѣ оставлен бысть от Господа. Призвах когда, услышан бысть от него. Или когда просит, и не приемлет ли? И ищет, и не обрящет ли от него? Вся убо Господь приемлет к нему приходящие с радостию и призывает. Но яко же убо силы на небесѣх не видят лице Божие. А егда грѣшник на земли покается, тогда ясно зрят лице Христово силы вся небесныя, и открывается слава Божества его, и видят лице его. Единыя убо души грѣшныя кающияся радость бывает на небесѣх всѣм силам небесным, и всѣм святым его.[23] А силы убо — ангелы и архаггелы, херувимы и серафимы, начала, и власти, и господьствия. И святыя убо сия суть: пророки, и апостолы, и святители, и преподобныя, и праведныя, мученики, и мученицы, и вси святии. Единого грѣшнаго ради покаяния бывает радость всѣм силам небесным и всѣм святым его. А не хотящаго, ни тщащаго, ни желающаго получения спасения себѣ не нудит Господь нуждею и неволею. Но по усердию и по произволению сердца все строит Господь человеку. Егда кто нераздвойным умом и вѣрою несуменною обѣщается, и помышляти ничто же суетно в себѣ, или возвратится въспять, не повѣда ни отцу, ни матери, и сестрам, и братиям и таковому Господь открывает и управит его в таковое благоутишное пристанище молитвами преподобныхъ отец наших онѣх, иже трудятся день и нощь непрестанно. От уст их молитва, яко кадило благоуханно. Молят же ся и о хотящих спастися истинным сердцем, а не ложнымъ обѣщанием. И хотящим спастися и молитися, который человек обратитися к ним и аще кто откуду обратился, таковаго приемлет с радостию, яко от Бога наставляема. И хотящему итъти в таковое мѣсто святое никакова помысла не имѣти лукава, и развращенна, и мятущего ум, и отводящаго в мѣста оного мысли человека того хотящаго итти. Но убо велми блюдися опасно мыслей злых, хотящих разлучити от мѣста того. И не помышляти сѣмо и овамо. Таковаго управит человека Гсподь на путь спасения. Или извѣщение приидет ему из града того иже или из монастыря того, иже сокровени бяху оба, град же и монастырь. Есть бо и лѣтописец книга о монастырѣ том. На первое слово возвращуся. Аще ли же пойдет и мыслити начнет, славити вездѣ, и таковому закрыет Господь. И покажется ему лѣсом и пустым мѣстом. И ничто же таковый получит себѣ, но токмо труд его всуе бысть. И соблазн, и укор и понос ему будет за сие от Бога. Казнь приимет здѣ и будущий вѣк, осуждение и тьму кромѣшную, иже таковому святому мѣсту поругася иже на конец вѣка сего чудо явися: невидим град бысть, якоже и в прежняя времена бысть много монастырей, не видимы быша, иже писаны в житиях святых отец, пространнѣе узриши. И сей град Болший Китежь невидим бысть и покровен рукою Божиею, иже на конец века сего многомятежна и слез достойного покры Господь той град дланию своею. И невидим бысть по их молению и прошению, иже достойнѣ и праведнѣ тому припадающих, иже не узрит скорби и печали от звѣря антихриста. Токмо о нас печалуют день и нощь, о отступлении нашем, всего государьства московского, яко антихрист царьствует в нем и вся заповѣди его скверная и нечистыя. Запустѣние града того повѣдают отцы, слышавши от прежде бывших их отец по разорении градском и по стѣ лѣтех послѣ нечестиваго и безбожнаго царя Батыя. Разори бо всю ту землю заузольскую и села и деревни огнем пожже. И лѣсом поростѣ вся та страна заузольская. И с того времени не видим бысть град той и монастырь. Сию убо мы книгу лѣтописец написали в лѣта 6759 и уложили собором и предали святѣй Божией церкви на утвержение всѣм православным христианом, хотящим прочитати или слушати, а не поругатися сему божественному писанию. Аще ли же который человек поругается или посмѣется нами преданному сему писанию, да вѣсть таковый: той не нам поругается, но Богу и пречистѣй его матери, владычицѣ нашей Богородицѣ и присно девѣ Марии. В нем же славится и величается и именуется великое имя ея, матери Божии, тѣх же и она соблюдает, и хранит, и покрывает дланию своею, и молитву за них к сыну своему глаголющи: «Не презри моего, сыне любезный, прошения. Иже кровь свою излия на весь мир, тѣмже и сих помилуй, и сохрани, и соблюди призывающих имя мое с вѣрою несумнѣнною и чистым сердцем». Тѣмже Господь покры их своею рукою, иже мы написали, и уложили, и предали. И к сему нашему уложению ни прибавити, ни убавити, ниже всяко пременити ни едину точку или запятую. Аще ли кто прибавит, или всяко пременит, да будет по святых отец преданию проклят, иже предавших сия и утвердивших. Аще ли кому невѣрно мнится, то прочти прежде бывших святых жития, и увѣсть, яко бысть много в прежняя времена сего. Слава иже в Троицы славимому Богу и пречистѣй его Богоматере, соблюдающей и хранящей мѣсто оно, и всѣм святым. Аминь. [/more]
Ответов - 0
полная версия страницы